Фестивал на биодиверзитетот – планински чај, магија и вкусови од цела Македонија

На 4 октомври (сабота), во просториите на Public Room (Јавна Соба) од 10 до 18 часот ќе се одржи четвртото издание на Фестивалот на биодиверзитетот, под мотото „Здрави корења, полни трпези“. Настанот е во организација на Слоу Фуд Водно со поддршка од Слоу Фуд Македонија.

Фестивалот веќе традиционално претставува празник на локалното производство, зачуваните сорти и одржливата исхрана. Ова е ден кога храната ќе раскажува приказни за вредните раце на производителите и за трпезите што се полнат со здрава, чиста и правична храна.

Годинава, во фокусот е планинскиот чај и неговите лековити својства. Гостин на фестивалот ќе биде Самет Абдули од Ростуше, Маврово – чувар на традицијата и познавач на билкарските тајни.

Во програмата е вклучена и табoтилница на општествената градина Бостание, која ќе ги запознае посетителите со семенските топки – иновативен начин за враќање на природата во секојдневниот живот. За најмладите, во 12 часот магионичарот Кристијан ќе приреди едукативен настап, покажувајќи дека храната може да биде вистинска магија.

Посебен дел е резервиран за работилницата за кисело тесто на artisan пекара Пан Пан, каде што ќе се приготвува „жив леб“ – автентичен производ што бара време и љубов.

Фестивалот ќе собере над 25 производители од цела Македонија, носејќи вкусови и приказни од различни региони на земјата. Покрај храната, посетителите ќе можат да уживаат и во музичка програма со DJ Soul Case.

Со поддршка од Министерството за земјоделство, шумарство и водостопанство, целта на настанот е јасна: промоција и поддршка за малите производители кои ја чуваат традицијата, но истовремено се прилагодуваат на современите вредности и трендови.