Моцартовото ремек-дело „Реквием“ ќе ја отвори новата сезона на Националната опера и балет

Националната опера и балет вечерва (3 октомври) ќе ја отвори сезоната 2025/2026 со едно од најмоќните и најемотивни остварувања во историјата на класичната музика – „Реквием“ од Волфганг Амадеус Моцарт.

Ова дело, создадено во последните месеци од животот на Моцарт, останува обвиено со мистерија и легенди. Секој тон од „Реквием“ ја носи неговата длабока емоционалност – од тивки молитвени моменти, до експлозивни хорски сцени – водејќи ја публиката од болка и тага кон надеж и вечност.

На сцената на НОБ ќе настапат врвни македонски солисти:

• Биљана Јосифов (сопран)

• Николина Јаневска (мецосопран)

• Јане Дунимаглоски (тенор)

• Владимир Саздовски (бас)

Заедно со оркестарот и хорот на Националната опера и балет, тие ќе понудат незаборавно музичко доживување. Настапот ќе го предводи италијанскиот диригент Џанлука Мартиненги, кој ќе ја внесе својата интерпретација на едно од најзначајните дела во светската музичка литература.

Со оваа свечена изведба на „Реквием“, Националната опера и балет го означува почетокот на новата сезона, отворајќи ја со моќна комбинација на музика, емоции и духовност која ја потврдува вечната големина на Моцарт.