Современото македонско музичко творештво во фокусот на „48. Денови на македонска музика“

Од 17 март до 8 април 2025 година, Скопје ќе биде домаќин на 48. издание на фестивалот „Денови на македонска музика“, во организација на Сојузот на композиторите на Македонија (СОКОМ).

Програмата, селектирана од годинашниот куратор, композиторот Филип Иванов, ќе понуди свежи перспективи на современото македонско музичко творештво преку концерти, премиери и авторски јубилеи.

Фестивалот, кој низ децениите се етаблираше како значаен форум за афирмација на македонските композитори, и оваа година ќе биде простор за креативен дијалог меѓу традицијата и модерниот музички израз. Посетителите ќе имаат можност да проследат дела од повеќе од 30 македонски автори, изведени од врвни солисти и ансамбли, како и настапи на меѓународни гости.

Јубилеи и специјални програми

Една од централните точки на годинашното издание е одбележувањето на значајни јубилеи на тројца истакнати македонски композитори:

• Властимир Николовски (100 години од раѓањето) – автор на монументални симфониски и вокално-инструментални дела со автентичен македонски музички израз.
• Стефан Гајдов (120 години од раѓањето) – пионер на македонската хорска музика, чија работа постави темели на националниот музички јазик.
• Кирил Македонски (100 години од раѓањето) – автор на првата македонска опера „Гоце“, со значаен придонес во развојот на вокално-инструменталната музика.

Престижни ансамбли и солисти

На фестивалската сцена ќе настапат реномирани ансамбли, меѓу кои Македонската филхармонија со диригентот Борјан Цанев, камерниот оркестар „Ајга“, дувачкиот квинтет PHILHARMONIC5, како и интернационалните гости: ансамблот „Мурска“ од Словенија и триото „Astnide“ од Германија.

Уметност во фокус

Свеченото отворање на фестивалот на 17 март ќе биде збогатено со изложбата „Мапирање на спокојот“ на композиторката и професорка Јана Андреевска, поставена во фоајето на Македонската филхармонија.

Фестивалот е под покровителство на Претседателката Гордана Сиљановска Давкова и финансиски поддржан од Министерството за култура. Влезот на сите настани е слободен.