Нетфликс ја откажа анимираната серија на Меган Маркл

Нетфликс ја отфрли очекуваната претстојна анимирана серија „Pearl“ на сопругата на принцот Хари (37), Меган Маркл (40), поради кратењето на буџетот и остриот пад на претплатниците.

Овој проект веќе подолго време беше во почетна фаза на создавање, а веста за откажување на соработката е нов удар за продуцентската куќа на Меган, Арчевел, која таа ја основа во 2020 година со принцот Хари.

Имено, целата приказна во цртаниот филм требаше да се врти околу 12-годишно девојче „на патување на самооткривање“ инспирирано од наследството на познати жени од историјата.

– Како и многу девојки на нејзина возраст, така и нашата хероина Перл е на патот на самооткривање додека се обидува да ги надмине секојдневните животни предизвици. Воодушевена сум што Archewell Productions, во соработка со моќната платформа Нетфликс и овие неверојатни продуценти, ќе ви ја спојат оваа нова анимирана серија, која ги слави извонредните жени низ историјата. Дејвид Фурниш и јас бевме желни да ја извадиме оваа специјална серија на виделина, и мило ми е што успеавме да ја објавиме денес – гласеше тогаш  соопштението на Меган.

Извршен продуцент на серијата беше сопругот на Елтон Џон , Дејвид Фурниш.

Но, ова не е единствената серија која Нетфликс одби да ја емитува.

Сè поголем број корисници го напуштаат Нетфликс и се префрлаат на други платформи за стриминг, а компанијата изгуби речиси половина од својата вредност. Нетфликс го заврши првиот квартал од оваа година со 221,6 милиони претплатници, 200.000 помалку од претходниот квартал.