Деми Мур во трка за Оскар – триумфираше на Critics’ Choice Awards

Деми Мур ја освои престижната награда за најдобра актерка на доделувањето на Critics’ Choice Awards во Лос Анџелес, зацврстувајќи ја својата позиција како главна фаворитка за Оскар. Истовремено, шансите на контроверзната шпанска актерка Карла Софија Гаскоњ полека опаѓаат.

Триумф за Мур и нејзиниот филм “Substance”

Познатата холивудска ѕвезда од 90-тите, која блесна во “Ghost”, “Striptease” и “G.I. Jane”, беше наградена за улогата во “Substance” – хорор-трилер на француската режисерка Корали Фаргеат. Филмот освои признание и за најдобро оригинално сценарио, што дополнително ја зацврсти неговата позиција во трката за престижните филмски награди.

Во “Substance”, 62-годишната актерка го толкува ликот на поранешна холивудска ѕвезда која експериментира со серум за младост, што ја води низ мрачна и непредвидлива приказна.

Мур: „Редок е ваков хорор филм што им дава длабочина на актерите“

На сцената, Мур им се заблагодари на филмските критичари за признанието, истакнувајќи дека “во хорор-филмовите ретко се гледа длабочината што актерите можат да ја донесат”.

Ова признание доаѓа по нејзината победа на Златните глобуси, а сега сите очи се вперени кон Оскарите, каде што може да ја потврди својата голема филмска камбек приказна.