Познато е кој ќе биде домаќин на 97. доделување на Оскарите

Конан О’Брајан, познатиот американски водител, комичар, сценарист и продуцент, е избран за домаќин на 97. доделување на Оскарите.

Тој за прв пат ќе се најде во улога на водител на престижната манифестација посветена на седмата уметност, по две години во кои домаќин на церемонијата беше Џими Кимел.

„Возбудени сме и почестени што О’Брајан ќе биде домаќин на доделувањето на Оскарите. Неговата исклучителна способност да се поврзе со публиката ќе ги зближи гледачите да го направат она што Оскарите најдобро го прават – да им оддаде почит на спектакуларните филмови и филмаџии од претходната година“, се вели во соопштението на организаторите.

View this post on Instagram

A post shared by The Academy (@theacademy)

Конан О’Брајан е најпознат по неговиот повеќедецениски стаж како водител на ток-шоуата „Late Night With Conan O’Brien“, „The Tonight Show With Conan O’Brien“ и „Conan“. Пред тоа, тој работеше како сценарист за хумористичната емисија „Saturday Night Live“ и анимираната серија „The Simpsons“.

Во својата кариера 31 пати бил номиниран за Еми, а пет пати ја добивал оваа награда.

Церемонијата на доделување на Оскарите е закажана за 2 март 2025 година. Ќе се одржи во театарот Долби во Лос Анџелес и ќе се емитува во живо во повеќе од 200 земји во светот.