Македонија ќе добие тужба пред меѓународните судови за аерозагадувањето

Граѓански активисти, Меѓаши и новинари за човекови права ќе ја тужат државата пред домашните и меѓународни судови поради аерозагадувањето. Организациите покренаа петиција за нула толеранција за аеро загадувањето и загрозување на животот и побараа помош од адвокат кој доброволно и без надомест ќе ги застапува.

Ја повикаа и меѓународната заедница којa силно се заложила за референдумот да помогнe и во борбата за живот и решавање на проблемот со загадувањето.

Според последните истражувања и анализи државата издвојува 300 милиони евра за лекување на граѓаните од последиците добиени од загадувањето, а само 1.5 милион за новата владина стратегијата Чист Воздух. Активистите остро реагираат на средствата одвоени за 2019година за животна средина и намалување на загадувањето со само 0.6 проценти од буџетот.

Здружените организации ги повикаа министерствата да ги почитуваат сите протоколи, резолуции и конвенции кои ги имаат потпишано. Побараа бесплатен јавен превоз во наредните 3 месеци, да се зголеми бројот на инспектори кои ќе вршат надзор, а за да имаат работа ги повикаа граѓаните да пријавуваат загадувач.