Хрватска повлекува пиперки од Македонија – пронајдена токсична материја метомил!

Европскиот систем за брзо предупредување за храна и добиточна храна (RASFF) испрати итно предупредување до Хрватска, откако во македонски црвени пиперки биле откриени нелегални количини на метомил – опасна супстанца која претставува сериозен ризик за здравјето на луѓето и животните.

Според информациите, пиперките потекнуваат од Македонија, а анализата покажала 0,049 мг/кг (ppm) метомил, што е речиси петпати повеќе од максимално дозволеното ниво од 0,01 мг/кг (ppm).

Поради тоа, Хрватските власти веднаш наредиле повлекување на зеленчукот од продажба.

Метомилот е карбаматен инсектицид, воведен уште во 1966 година, кој се користи за заштита на земјоделски култури од инсекти, но во високи концентрации е исклучително токсичен. Тој може да предизвика сериозни здравствени последици, особено при директен контакт или консумирање на производи кои го содржат.

Европските надлежни институции го категоризираа овој случај како „сериозен ризик“, со јасна препорака за итно повлекување од пазарот и следење на потеклото на производот.

Според извештајот, примерокот бил земен на 23 септември, а Хрватска добила официјално известување на 3 октомври 2025 година.

Информацијата ја пренесува Дневно.хр, наведувајќи дека се очекува и реакција од македонските институции и контрола на земјоделските производи што се извезуваат на европскиот пазар.

Овој случај повторно ја отвора темата за безбедноста на храната, контролата на пестициди и хемикалии во земјоделството, како и потребата за построга регулатива и мониторинг на производите што се пласираат во ЕУ.