ВИКЕНД ПРОГНОЗА: Ведро, но студено – од вторник снег

Најниска температура од -6 степени утрово е измерена во Крушево, Берово и Лазарополе, -5 степени се измерени во Маврово, -4 во Ѓуриште, Охрид и Штип, -3 во Куманово, Претор и Струмица, -2 во Пожаране, Тополчани, Виница и Крива Паланка, -1 во Прилеп и Битола, нула степени во Демир Капија и Тетово, 1 степен во Дојран и Скопје, а 2 степени во Гевгелија.

Како што соопшти Управата за хидрометеоролошки работи (УХМР), времето утринава во земјава е сончево, тивко и студено. Дува слаб ветер од северен правец кој повеќе е изразен на повисоките места и планините.

Времето утре ќе биде сончево со мала до умерена облачност и студено. Ќе дува слаб до умерен источен ветер. Утринска температура ќе се движи од -10 до -3, дневна температура од 1 до 7 степени. Во Скопје променливо облачно со умерен северен ветер и температура до 5 степени

Од УХМР информираат дека за викендот и во понеделник изутрина времето ќе биде ведро и студено. Од понеделник преку денот облачноста ќе се зголемува, а од вторник а се очекуваат повремени врнежи од дожд и снег.