Заглавените граѓани кај скопската обиколница бараа помош преку социјалните мрежи

Преку триесет возила скоро час и половина беа заглавени вечерва на скопската обиколница поради силното невреме кое го зафати Скопје. Според информации од граѓаните, свлечиште создало насип, поради кој се насобирало вода, која влегувала и во автомобилите, пренесува Нова Македонија.

Граѓаните бараа помош преку социјалните мрежи, известуваа за свлечиштето и дека во некои од возилата има и бебиња и мали деца.

Според последните информации, специјалните единици успеале да се пробијат до возилата и им помагаат на луѓето што биле заглавени на обиколницата.

Сѐ уште е непотврдена информацијата за почината жена во близина на Смилковското Езеро.

На социјалните мрежи се објавуваат апели за помош за повеќе заглавени автомоили на повеќе локации, меѓу кои и скопската обиколница.

Еве шо дочекав, да те страв за сопствениот живот, во вакви ситуации само Господ може да те чува! pic.twitter.com/yKfIjFf4ka

— Сајлент (@dr_arsen) August 6, 2016

Граѓаните велат дека и покрај обидите не можат да ја добијат полицијата на бројот 192.

Од Град Скопје, пак, апелираат до граѓаните да останат во нивните домови и да не излегуваат со возила се додека не престане невремето и не се создадат услови за нормално одвивање на сообраќајот.

Од Центарот за управување со кризи изјавија дека засега нема информација за повредени или исчезнати граѓани на територијата на Скопје. На бесплатниот телефонски број од 18 часот кога почна невремето во главниот град се регистрирани голем број јавувања на граѓани кои информираат за поплавени домови и заглавени возила на поплавени улици.