Нетфликс го објави првиот трејлер за новата документарна серија на Дејвид Бекам

Наскоро доаѓа новата серија на Нетфликс за Дејвид Бекам, а трејлерот штотуку е објавен. Документарната серија „Бекам“ ги следи подемите и падовите во животот на Бекам – и како глобална спортска ѕвезда и како глава на едно од најпознатите семејства.

„Бекам, документарна серија од четири дела, зборува за глобална фудбалска ѕвезда и културна икона. Дејвид Бекам е едно од најпознатите имиња на планетата, но малкумина знаат кој е тој навистина.

Од неговите скромни почетоци во работничката класа во Источен Лондон, неговата желба и решеност да победи и неговата борба да најде рамнотежа помеѓу амбицијата, љубовта и семејството, приказната на Дејвид е една приказна за огромните подеми и падови“, велат од Нетфликс.

Трејлерот прикажува видеа од Бекам на почетокот на неговата кариера и како дете пред да потпише со Манчестер Јунајтед и неговото скромно воспитување во Источен Лондон. „Никогаш не се снајдов добро на училиште“, вели тој. „Се што навистина сакав да правам е да играм фудбал“.

Се прикажуваат и интервјуа со неговата сопруга Викторија Бекам, која зборува за тоа како тие двајца се запознале и раните денови од нивната врска. „Ќе се сретневме на паркинзи, и тоа не е толку страшно како што звучи“, вели Викторија.

Трејлерот покажува како Бекам на крајот станува повеќе медиумски производ со голем број реклами додека неговата кариера започнува во Англија. Тој тврди дека славата не го променила, но оние околу него велат поинаку. Трејлерот навестува дека Бекам влегува во кавга со иконскиот менаџер на Манчестер Јунајтед, Алекс Фергусон. Го доловува неговото време во Реал Мадрид, раѓањето на неговите деца и подемот на неговиот успех.

Документарната серија ја режираше Фишер Стивенс, а извршни продуценти се Дејвид Гарднер и Гери Невил. Треба да излезе на Нетфликс на 4 октомври.