„Градски паркинг“ наскоро започнува со наплата на паркингот во Ново Лисиче и Реонски Центар

Паркирањето во Ново Лисиче и Реонски Центар наскоро ќе биде под наплата, соопшти денеска в.д. градоначалникот на Аеродром, Дејан Митески. Новиот режим, кој ќе го спроведува ЈП „Градски паркинг“, треба да стартува најдоцна до крајот на септември.

Митески објасни дека проектот за зонско паркирање е веќе подготвен од страна на Општината и дека во моментот се чека одобрување од Град Скопје и МВР. По добиената зелена светлина, веднаш ќе започне означувањето на паркинг-местата и поставување на соодветна сигнализација.

„Се планира истовремен старт на зонскиот режим и во Ново Лисиче и во Реонски Центар, со цел да се избегне прелевање на возила од едно кон друго маало“, нагласи Митески.

Жителите одамна алармираат дека паркирањето станува сè поголем проблем, бидејќи просторите пред зградите ги заземаат и возила на луѓе кои работат во други општини, каде паркингот веќе се наплатува. Со воведувањето на зонското паркирање, се очекува поголем ред и олеснување за локалното население.