Доколку не се користи правилно, AI може да ни ја „избледи“ интелигенцијата!

Корисниците кои премногу се потпираат на вештачката интелигенција (AI) на работното место може да го намалат својот когнитивен напор и критичко размислување, покажува ново истражување спроведено од Универзитетот Карнеги Мелон и Microsoft.

Студијата, која вклучува 300 вработени во Microsoft, покажала дека прекумерното користење на AI алатки како Copilot може да ги наведе луѓето да изберат „полесен пат“, што на долг рок може да ја ослабне нивната способност за анализирање и донесување сложени одлуки. Наодите ќе бидат претставени на престижна конференција за технологија и човечки фактори во Јапонија.

Поголема доверба во AI – помал когнитивен напор

Истражувачите забележале дека оние кои почесто користат AI имаат тенденција да преземаат помалку когнитивно комплексни задачи, фокусирајќи се наместо тоа на проверки на резултатите од алгоритмите. Намалувањето на критичката мисла може да влијае на долгорочните професионални вештини, особено во области кои бараат аналитичко размислување и решавање проблеми.

Според научниците, користењето AI не е само по себе проблем, туку начинот на кој корисниците пристапуваат кон него. Наместо AI да се гледа како заменик за размислување, подобро е да се користи како алатка за подобрување на креативноста и иновацијата.

AI ја менува улогата на критичкото размислување

Истражувањето покажува дека генеративната вештачка интелигенција го преориентира критичкото размислување од решавање проблеми кон валидирање информации и управување со задачи. Ова значи дека AI ги олеснува секојдневните активности, но може да ја намали потребата од длабоко размислување и стратешко планирање.

„Поголемата доверба во AI доведува до помалку критичко размислување“, наведуваат истражувачите, предупредувајќи дека неконтролираната употреба на ваквите технологии може да резултира со намалени когнитивни способности на долг рок.