Концерт на годината, Некст Тајм и Лозано во Антички!

За прв пат во Македонија на 30ти јули во Античкиот театар во Охрид заеднички концерт ќе оддржат моментално најактуелните македонски звезди, групата Некст Тајм и Лозано.

-Овој настан за нас е од огромно значење пред се поради тоа што првиот наш фестивал во 2008 како Некст Тајм, беше токму овде на Антички и ја освоивме публиката која исто така и ден денес е со нас. Заедно со Лозано се појавивме на тој фестивал и некако се зближивме од тогаш. После толку години градејки ги нашите музички кариери ете стигнавме да одржиме за прв пат заеднички концерт. Се надеваме дека публиката ќе ужива во песните од нашиот најнов албум, но сигурно ќе има и изненадувања – велат Мартин и Стефан Филиповски од Некст Тајм.

Очекуваат публиката да дојде во голем број и заедно да уживаат во една незаборавна вечер исполнета со заедничката уметност.

За Влатко Лозаноски – Лозано Античкиот театар е историски простор каде што секој изведувач од Македонија би сакал да настапува, како еден од најреномираните локалитети за правење концерти воопшто кај нас.

-Отворената сцена, но и самата историја која што ја крие “антички” дава на тежина и големо значење на секој евент кој што се организира таму. Со големо исчекување го очекуваме концертот и ветуваме заеднички дека ќе направиме одлична музичка претстава на сите присутни. Ги покануваме сите во Охрид и уште еднаш “ова лето ќе се памти” по уште еден одличен концерт заедно со моите пријатели од Некст Тајм – изјави Лозано.

Влезниците за овој спектакл веќе се во продажба преку продажната мрежа на „Купи карти за се“ како и онлајн на следниот линк.