Промоција на талентите на средношколците во Скопје на настанот „Средноленд”

Во Скопје се организира настанот “Средноленд”, кој е иницијатива на професори и ученици од средните училишта.

Овој повеќедневен настан ќе се одржи на неколку локации од 2 до 6 мај, вклучувајќи ги Плоштад Македонија, КИЦ, МКЦ и Градски парк – Школка.

Целта на настанот е да се промовираат талентираните средношколци кои ќе имаат можност да се претстават преку музика, танц, ликовна уметност, драмска уметност, фотографија и филм.

Организаторите велат дека целта е да се насочат учениците кон вистинските вредности, да го приближат светот на средношколците до јавноста и да се постави темел за соработка меѓу училиштата и меѓуинституционална поддршка.

На настанот ќе учествуваат скопските гимназии “Никола Карев”, “Ѓорѓи Димитров”, “Орце Николов”, “Јосип Броз Тито” и “Раде Јовчевски-Корчагин”.