Принц ќе ја претставува Србија на Евровизија

Србија вчера го избра својот претставник на овогодинешниот Евросонг во Базел. Наследникот на Теја Дора е Принц со баладата „Мила“.

„Искрено, мислев дека ова е невозможно. Благодарам на сите што ми помогнаа на овој пат. Како ја доживувам победата? Како врв на кариерата“, изјави пејачот низ солзи.

Инаку, пред неколку години беше блиску до победа и, како што рече, тогаш му се промени животот.

По двете полуфиналиња одржани во вторникот и средата, на големото финале на „Песна на Евровизија 25“ учествуваа шеснаесет финалисти во емисијата што се одржа во живо од студиото на РТС, а победникот беше избран со комбинирани гласови на публиката и стручното жири.

Финалисти беа Oxajo со песната „МаМа“, Мими Мерцедез со „Турбо журка“, Вукајла со песната „МАСК“, Ana & The Changes со „Бринем“, Бибер со „Да ми се вратиш“, Бојана х Давид со песната „Шесто чуло“, Маршали со „По полицама сечања“, Принц со „Мила“, Седлар со „Очи боље земје“, Ленси со „Хвала ти“, Милан Николиќ и Цака ја изведоа песната „Storia del amor“, Harem Girls со „Аладин“, Там и „ДУРУМ ДУРУМ“, Филари со „Meet and Greet“, Исказ со „Trendseter“ и Круз Руди со песната „Све и одмах“. Водители беа Драгана Косјерина, Кристина Раденковиќ и Стефан Попов.

Обложувалниците и предвидуваа победа на Мими Мерцедез, а големи шанси доби и Там, која на крајот добро се пласираше, но не победи. Најмногу прашина сепак кренаа драг кралиците Harem Girls, кои јавно ги поддржаа и Марија Шерифовиќ и Јелена Карлеуша.