10 е-трговци ќе добијат бесплатен беџ за верификуван е-трговец

Асоцијацијата за е-трговија на Македонија (АЕТСМ) објави нов јавен повик преку кој 10 е-продавници ќе имаат можност целосно бесплатно да добијат верификација и да се стекнат со Беџ за верификуван е-трговец – симбол на доверба во онлајн трговијата. Повикот се реализира во рамки на националната кампања „Безбедното онлајн купување започнува со тебе“, со поддршка на компанијата Visa.

Поради големиот интерес и позитивното искуство од претходните години, АЕТСМ повторно им овозможува на компаниите да станат дел од заедницата на над 80 верификувани е-продавници во земјата. Овој беџ им овозможува на купувачите лесно да препознаат сигурни и проверени онлајн продавници, додека е-трговците добиваат јасна предност пред нелојалната конкуренција и нерегистрираните продавачи.

Беџот за верификуван е-трговец гарантира дека продавницата е:

• регистриран правен субјект,

• проверена од АЕТСМ според важечките регулативи,

• дел од официјалниот Регистар на е-трговци.

Аплицирањето е наменето за микро, мали и средни претпријатија кои моментално продаваат производи и/или услуги онлајн и досега не биле поддржани преку ваков повик. Процесот е целосно онлајн и едноставен, а рокот за аплицирање е до 10 октомври 2025 година, до полноќ.

Сите информации за верификацијата, критериумите за селекција и листата на досегашни верификувани е-трговци се достапни на платформата ecommerce.mk/badge, која овозможува и автоматизирано управување и обновување на беџот.

Иницијативата се реализира со континуирана поддршка од Visa, која трета година по ред е партнер на АЕТСМ во јакнењето на довербата во онлајн купувањето, транспарентноста и намалувањето на сивата економија. Со овој проект се охрабруваат компаниите да работат професионално, во согласност со законските обврски и во интерес на потрошувачите.