Светска епидемија на „вејпинг“ кај младите – СЗО бара итна реакција

Светската здравствена организација (СЗО) објави загрижувачки податоци – повеќе од 15 милиони тинејџери ширум светот, на возраст од 13 до 15 години, користат електронски цигари. Според првата глобална проценка на оваа појава, младите „вејпаат“ девет пати почесто од возрасните во земјите каде што постојат релевантни податоци.

Во моментов, се проценува дека над 100 милиони луѓе користат е-цигари, од кои најмалку 86 милиони се возрасни, главно во земји со висок приход. Истовремено, бројот на традиционални пушачи опаѓа – од 1,38 милијарди во 2000 година, на 1,2 милијарди во 2024 година.

Етиен Круг, директор на одделот на СЗО за здравствени детерминанти, предупредува дека е-цигарите создаваат нов бран на зависност од никотин кај младите.

„Овие производи често се прикажуваат како помалку штетни, но во реалноста децата многу порано се навикнуваат на никотин, што може да го уништи долгорочниот напредок во јавното здравје,“ изјави Круг.

Иако дел од студиите покажуваат дека е-цигарите можат да помогнат на возрасните пушачи да се откажат од тутунот, експертите предупредуваат дека нема доволно докази за нивните долгорочни ефекти врз здравјето.

СЗО дополнително потсетува дека речиси една од пет возрасни личности во светот и понатаму користи тутунски производи, при што Европа го држи водството со 24,1% активни пушачи, а европските жени имаат највисока стапка – 17,4%.

Организацијата повикува владите и здравствените институции да воведат построги мерки за контрола и регулација на новите никотински производи, вклучително и е-цигарите, со цел да се заштитат младите од растечката зависност.