„Есмералда“ од Чезаре Пуњи на сцената на Националната опера и балет на 19 февруари

Еден од најубавите класици на балетската уметност, „Есмералда“ од италијанскиот композитор Чезаре Пуњи, ќе биде изведен на сцената на Националната опера и балет на 19 февруари, со почеток во 20:00 часот.

Балетот, инспириран од романот „Ѕвонарот на Богородичната црква” на Виктор Иго, ја раскажува приказната за убавата и страсна Есмералда. Спектакуларната изведба ќе биде под диригентската палка на Едуард Амбарцумјан (Ерменија), додека кореографијата ја потпишува Михаил Крапивин (Русија). За раскошната сценографија и костимографија се заслужни Живојин Трајановиќ и Љупка Ристовска, а концерт-мајстор ќе биде Јане Бакевски.

Првенци и солисти во главните улоги:

• Есмералда – Марија Кичевска Шокаровска
• Феб – Франциско Хименес Руиз (Шпанија)
• Флер де Лис – Симона Колиштркоска
• Гудула – Саша Евтимова, која оваа година слави 25 години уметничка дејност како балетски играч, педагог и кореограф

Во претставата ќе настапат првенците, солистите, балетскиот ансамбл и оркестарот на Националната опера и балет.

Балетот „Есмералда“, познат по техничката сложеност и емоционалната длабочина, нуди спектакуларни танцови изведби кои ја водат публиката низ приказна за љубов, судбина и жртва. Оваа вечер ќе донесе незаборавно балетско искуство, кое ќе ги поттикне гледачите да размислуваат за силата на човечките чувства и предизвиците на животот.