Нови авиолинии до Женева и Париз од Скопје: Прекуокеански лет за Америка следен на листата

На барање на македонската дијаспора, оваа година стартуваат редовни летови на релација Женева – Скопје, изјави вицепремиерот и министер за транспорт, Александар Николоски. Дополнително, воведена е и значајна нова линија од Париз, од аеродромот „Орли“, кој се наоѓа во непосредна близина на познатата Шанзелизе.

Како што соопшти Министерството за транспорт, Николоски нагласи дека промената на политиката на субвенционирање дала резултати.

„За само шест месеци воведовме девет нови дестинации, вклучувајќи линии од Скопје кон Барселона, Лион, Дубаи, Штутгарт и Амстердам, како и од Охрид кон Базел и Истанбул. Овие летови се значаен успех, особено за македонската дијаспора во Швајцарија и Франција, која досега мораше да користи конектинг летови или аеродроми од соседните земји“, истакна Николоски.

Покрај тоа, тој најави дека се работи и на проект за воведување прекуокеански летови.

„Таргетираме летови до Северна Америка, што би било голем чекор за Скопје да стане третиот аеродром на Балканот со ваква услуга. Ова е комплексен процес кој бара безбедносни протоколи и исплатливост, но сум умерен оптимист дека ќе го постигнеме тоа“, додаде Николоски, нагласувајќи дека таквите летови би придонеле за развојот на туризмот, бизнисот и имиџот на Македонија.

Во контекст на инфраструктурните проекти, Николоски информираше дека во последните десет дена се пуштени во употреба три големи проекти:

• Експресниот пат Куманово – Страцин – Крива Паланка
• Делницата Градско – Дреново од патот кон Прилеп
• Железничката пруга Куманово – Бељаковце

„Во рок од две недели, во употреба се пуштени 42 километри експресни патишта и 31 километар пруга – ретко постигнување, не само во Македонија, туку и во регионот“, заклучи Николоски.