Вчера регистрирани повеќе од 13 земјотреси во Скопје

Телеметриската сеизмолошка мрежа на Република Македонија, вчера регистрирала повеќе од 13 земјотреси во Скопското епицентралното подрачје.

Серијата започнала со земјотрес во 6 часот и 58 минути, кој имал локална Рихтерова магнитуда 3.9, а бил почувствуван во Скопје и околината со интензитет од VI-VII степени според Европската макросеизмичка скала.

Една минута подоцна, во 6 часот и 59 минути, се случил друг послаб земјотрес, со локална Рихтерова магнитуда 2.8, а со интензитет во Скопје и околината од IV-V степени според Европската макросеизмичка скала.

По ова следувале послаби и непочувствувани земјотреси.

Најсилниот земјотрес се случил во 15 часот и 10 минути, со локална Рихтерова магнитуда 5.3. Истиот бил почувствуван во Скопје и околината со интензитет од VII-VIII степени според Европската макросеизмичка скала, а со послаби интензитети – и во останатите делови на Република Македонија. Во Скопје и околината настанаа извесни оштетувања на постарите градби.

По овој земјотрес, до околу 18 часот регистрирани се околу 10 послаби земјотреси, од коишто со мали интензитети се осетени четири.