Игор Џамбазов со трогателна изведба: „Ако утре ме нема“ како опомена за сите нас (ВИДЕО)

Минатата сабота, на 16 март, Македонија се разбуди во шок. Трагедијата што ја потресе целата земја – пожарот во ноќниот клуб „Пулс“ во Кочани – однесе 59 животи, а повеќе од 100 лица беа повредени. Првичниот шок помина, но болката останува, тишината зборува повеќе од зборовите, а загубата ќе остане како длабока рана во македонското општество.

Седум дена подоцна, семејствата на загинатите, пријателите и целата јавност продолжуваат да тагуваат. Трагедијата остави неизбришлива трага, потсетувајќи на кревкоста на животот и на неопходноста од строги безбедносни мерки во јавните објекти.

Игор Џамбазов со емотивна посвета: „Песнава ме прогонува…“

На точно една недела од несреќата, актерот и шоумен Игор Џамбазов на своите социјални мрежи објави видео во кое ја изведува песната „Ако утре ме нема“ од ДНК – песна која, за жал, стана симбол на оваа трагедија.

„Песнава ме прогонува. Со денови наназад, ми дише во врат. Како потстанар да ми е во мозокот. Како краста што не зараснува. Како доказ за бесмисленоста на животот. Како опомена за идните генерации. Почивајте во мир, деца наши…“ – напиша Џамбазов, додавајќи уште една емотивна нота на оваа колективна тага.

View this post on Instagram

A post shared by Igor Djambazov (@igordzambazov)

Песна која останува како потсетник

„Ако утре ме нема“ е песна снимена во 2022 година од ДНК и Оркестарот на Џамбо Агушев. Таа беше еден од најголемите хитови на групата, редовно изведувана на нивните концерти. Трагично, нејзиниот пејач Андреј Ѓорѓиески, заедно со уште шест членови на бендот – тапанарот Ѓорѓи Ѓоргиев, басистот Александар Коларов, клавијатуристот Филип Стевановски, придружниот вокал Сара Пројковска, битбоксерот Мартин Атанасовски и тонецот Игор Велков – ги загубија животите во пожарот.

Тројца преживеани – гитаристот Горан Тонев, Панчо и Ана Костадиновска – остануваат единствените сведоци на таа кобна ноќ, но и гласници на болката што никогаш нема да се заборави.