„Мајка“ на Теона Митевска оди во 15 земји – светска премиера во Венеција!

Филмот „Мајка“, најновото дело на режисерката Теона Стругар Митевска, доби меѓународна дистрибуција во 15 земји пред својата светска премиера на престижниот Венециски филмски фестивал. Европската кино-дистрибуција започнува на 3 декември.

Оваа македонска продукција, инспирирана од духовниот и човечкиот пат на Мајка Тереза, ќе го отвори натпреварувачкиот програмски сегмент „Хоризонти“ на 82. издание на фестивалот во Венеција.

Продуцентката Лабина Митевска истакна дека „Мајка“ се снимаше на три континенти и претставува еден од најамбициозните проекти на македонската кинематографија. Филмот не е биографија, туку интимна драма за седум клучни дена од животот на младата Тереза, пред нејзиниот духовен повик да стане мисија.

Главната улога ја игра шведската актерка Номи Рапас, позната од „Девојката со тетоважа на змеј“, а во филмот се појавуваат и Никола Ристановски и Силвија Фокс. Косценарист е писателот Гоце Смилевски.

Македонската премиера е закажана за 20 септември на фестивалот „Браќа Манаки“ во Битола.

Филмот е поддржан од Агенцијата за филм на Македонија, како и од неколку европски и меѓународни фондови. Дистрибуцијата ја води француската агенција „Кинолоџи“, која веќе обезбеди прикажување во Франција, Германија, Италија, Шведска, Шпанија и уште десетина држави.