Голем концерт во замокот Виндзор за крунисувањето на кралот Чарлс Трети

Екстравагантен концерт се одржа во замокот Виндзор во чест на кралот Чарлс III и кралицата Камила, еден ден по церемонијата на крунисувањето во Вестминстерската опатија.

Британскиот актер Хју Бонвил го модерираше настанот од огромната сцена во Виндзор, а на тој исклучителен настан во публиката имаше околу 20.000 поканети Британци кои со извици на воодушевување ги пречекаа новокрунисаниот британски крал Чарлс Трети и неговата сопруга кралицата Камила.

Ним им се придружија принцот Вилијам и Кејт Мидлтон, кои дојдоа со нивните деца, принцот Џорџ и принцезата Шарлот. Сепак, многумина забележаа дека овој пат не беше присутен најмладиот член, принцот Луис (5), па ја коментираа ситуацијата на социјалните мрежи.

Пред осветлениот замок настапија бројни врвни музичари, меѓу кои и Лајонел Ричи, како и Андреа Бочели и велшката оперска ѕвезда Брин Терфел. Се појавија и популарните цртани ликови Мис Пиги и жабата Кермит, подоцна, меѓу другите, на сцената излегоа и поп-ѕвездата Кети Пери и групата „Take That“.

Престолонаследникот Вилијам излезе на сцената за да одржи говор посветен на неговиот татко, кој беше крунисан за нов британски крал во саботата во лондонската Вестминстерска опатија.

„Тато, сите сме горди на тебе“, рече принцот Вилијам пред да ја пофали посветеноста на кралот на круната, како и неговата еколошка и добротворна работа.

Вилијам исто така рече дека покојната кралица Елизабета би била многу горда на кралот Чарлс III. и неговото крунисување.

„Како што рече баба ми кога беше крунисана, крунисувањата се залог на нашите надежи за иднината. И знам дека таа е таму горе, нежно нè набљудува и би била многу горда мајка“, рече Вилијам во својот говор, проследен со извици на воодушевување од насобраните.

Во својот говор, Вилијам им оддаде почит и на британските работници и државни службеници, вклучувајќи ги наставниците и болничките работници, од кои многумина штрајкуваа во последните месеци.

Холивудската ѕвезда Том Круз, актерката од „Династија“ Џоан Колинс, ТВ водителката Бер Грилс и пејачот Том Џонс, сите се обратија преку видео пораки.

Беа прикажани и серија однапред снимени сцени кои откриваат малку познати факти за монархот и проекции на британските знаменитости и природна убавина, кои се дел од проектот под наслов „Осветлувајќи ја нацијата“ (Lighting up the Nation)“.

Исто така, се одржа спој од театарски, балетски, театарски и уметнички претстави заедно со новата ѕвезда на „Doctor Who“ Нкути Гатва, во изведба на Шекспировата „Ромео и Јулија“.

Спектакуларно светлосно шоу, комплетно со осветлено летало што лебди над Виндзор, беше изведено на источниот тревник на замокот, што е првпат ваков настан да се одржи на имотот.