Јелена Карлеуша сака да го врати профилот: „Ќе се сретнам со претставници на Инстаграм во Америка“

Српската пејачка Јелена Карлеуша тврди дека наскоро ќе одржи состанок со претставници на Инстаграм во Соединетите Американски Држави поради затворањето на нејзиниот профил. Нејзината цел е што поскоро да го врати пристапот до споменатата социјална мрежа и таа ги презема сите потребни чекори за да го постигне тоа.

Таа ja објави оваа информација на својот профил на мрежата  X.

„Денес се навршуваат три месеци откако мојот Инстаграм беше затворен. За неколку дена, ќе се сретнам со претставници на Инстаграм како дел од META во Америка, заедно со моите правни застапници. Во случај да не го вратам профилот, ќе морам да отворам нов и да почнам од нула. Наскоро ќе бидете известени“, напиша Карлеуша на X.

Откако во Србија беа организирани протести против владата, Карлеуша сè погласно ги напаѓаше граѓаните на социјалните мрежи, а во исто време продолжи силно да ја поддржува политиката на претседателот Александар Вучиќ. Таа имаше повеќе од два милиони следбеници на нејзиниот Инстаграм профил, а нејзиниот профил беше затворен откако Здружението на граѓани „Еко Стража“ покрена петиција за негово отстранување.