Лејди Гага откри: „Мојот прв свршенички прстен беше ливче трева“

Поп-ѕвездата Лејди Гага откри дека има две свршенички приказни во една – првата, неочекувано скромна, а втората, вистински холивудски луксуз.

Во интервју за „Шоуто на Ховард Стерн“, пејачката раскажа како нејзиниот свршеник, Мајкл Полански, прво ја запросил со ливче трева, а подоцна ѝ подарил блескав дијамантски прстен вреден 2 милиони долари.

Необичен предлог за брак со ливче трева

Гага откри дека пред самото запросување, Полански ја прашал како би сакала да изгледа моментот што ќе ѝ го промени животот.

„Му реков: ‘Само земи ливче трева од градината и завиткај ми го околу прстот’“, се присети пејачката.

На 1 април минатата година, тој го направил токму тоа – ја запросил со едноставно ливче трева, кое подоцна било заштитено со смола за да може да се носи како прстен. Сепак, неколку месеци подоцна, музичката дива добила и класичен дијамантски прстен, кој според извори вреди 2 милиони долари.

Двата прстена имаат свое значење

Иако парчето со блескав камен би било главен избор за многумина, Гага вели дека токму симболичниот прстен од трева ѝ е подеднакво драг.

„Двата ми значат многу, но ливчето трева – тоа е нешто што не можеш да го замениш“, изјави пејачката, откривајќи дека често ги носи двата прстена истовремено.

Љубовната приказна на Гага и Полански

Лејди Гага и Мајкл Полански ја започнаа својата врска непосредно пред почетокот на пандемијата, но долго време ја чуваа далеку од очите на јавноста. Се дозна дека се свршени кога парот заедно се појави на црвениот тепих на Венецискиот филмски фестивал, каде што Гага за првпат го покажа скапоцениот прстен.

Во гостување кај Џими Кимел, пејачката се пошегува дека нивната венчавка може да биде или минималистичка или целосно екстравагантна.

„Разговараме за тоа да одиме кај матичарот само ние двајца и да нарачаме кинеска храна. Но, знаејќи ме мене, тоа лесно може да се претвори во циркус со еднорози“, изјави Гага низ смеа.