Погребан актерот Метју Пери, го испратија колегите од „Пријатели“

Семејството и екипата од серијата „Пријатели“ се собраа вчера на гробиштата Форест Лон во Лос Анџелес за да се простат од актерот Метју Пери.

На приватен собир кој беше организиран во чест на легендарниот Чендлер Бинг, се собраа таткото на актерот Џон Бенет Пери, мајката Сузан Морисон и очувот Кит Морисон, како и соработниците на Метју од серијата Џенифер Анистон, Лиза Кудроу, Кортни Кокс, Мет Лебланк и Дејвид Швимер, како и други, пријатели и членови на семејството, сите облечени во црно.

По церемонијата, Пери беше погребан во темно дрвен ковчег со присутни само членови на семејството. Не е познато дали Пери побарал црква за последното збогување или тоа било одлука на семејството. Исто така, не се знае дали ќе има јавна церемонија за збогување со актерот.

Гробиштата се наоѓаат спроти студиото на Ворнер Брос, каде десет сезони се снимаше „Пријатели“ и е вечен дом на многу други починати ѕвезди. Церемонијата завршила со изведбата на песната „Don‘t Give Up“ од Питер Габриел.

Да потсетиме, познатиот актер Метју Пери беше пронајден мртов во џакузи, во својот дом во Лос Анџелес, на 28 октомври 2023 година. Неговото безживотно тело го пронашол неговиот асистент, кој веднаш повикал брза помош, но кога стигнале на адресата лекарите можеле само да констатираат смрт.

Се наведува дека актерот се удавил, но се уште се чекаат резултатите од обдукцијата и токсиколошките тестови, за да се знае точната причина за смртта.

Познатата петорка од „Пријатели“ со кои Метју беше многу близок, објавија заедничко соопштение во врска со смртта на нивниот колега.