Јубилејна година за Институтот за македонски јазик „Крсте Мисирков“

Институтот за македонски јазик „Крсте Мисирков“ најавува одбележување на неколку значајни јубилеи во текот на 2025 година.

Оваа година ќе се одбележат 80 години од усвојувањето на македонскиот правопис и азбука, 100 години од раѓањето на Трајко Стаматоски, еден од основачите на Институтот, како и 75 години од излегувањето на првиот број на списанието „Македонски јазик“.

Меѓу јубилеите се и 55 години од вселувањето на Институтот во денешната зграда, која беше подарок од македонските иселеници, како и чествувања во чест на научниците Благоја Корубин, Тодор Димитровски, Зденка Рибарова, Убавка Гајдова и Снежана Веновска-Антевска.

Институтот, кој е дел од Универзитетот „Св. Кирил и Методиј“ во Скопје, најави и промоции на најновите проектни изданија како дел од годишните активности.