Со претставата „Ничија земја“ в сабота почнува 4. „МНТ Фест“

Под мотото „Создаваме на светов убавина“, од трети до 13 јуни ќе се одржува четвртиот Меѓународен театарски фестивал „МНТ Фест“ во организација на Македонскиот народен театар. Фестивалот ќе биде отворен в сабота со премиерата на претставата „Ничија земја“ во адаптација и режија на Александар Морфов. 

Директорот на МНТ Дејан Пројковски на денешната прес-конференција информира дека на 5. и 6 јуни гостува претставата „Магбет“ од Пекинг, Кина. На 8 јуни гостува Народниот театарот „Иван Вазов“ со „Дон Жуан“, а на 13 јуни Народно позориште од Белград со „Иванов“ во главна улога со нашиот актер Никола Ристановски.

Тој најави дека в недела ќе има МНТ фест за деца, кога ќе има две претстави за деца „Силјан штркот“ и „Аладин“. Идејата, како што рече, е натаму да има интернационална детска програма.

– На 3 јуни во 19:30 часот, пред премиерата, ќе биде отворена изложба на Драган Гајиќ, кој е еден од фотографите кој се занимава со театарска фотографија и преку фотографија го бележи и го меморира она театарско време што го живееме, рече Пројковски.

Во рамки на фестивалот ќе има две работилници. Првата, како што рече, е ликовна колонија каде десетина млади сликари ќе работат портрети на наши актери, а втората работилница е за театарска фотографија. Млади фотографи ќе ги фотографираат претставите кои доаѓаат, а потоа ќе има изложба.

Претставата „Ничија земја“ е по сценарио на Данис Тановиќ и Александар Морфов. Во неа играат Сашко Коцев, Никола Ацески, Александар Михајловски, Гораст Цветковски, Александар Микиќ, Славиша Кајевски, Александар Ѓорѓиески, Борче Начев, Камка Тоциновски, Марија Кондовска…

Сценографи се Никола Тороманов и Валентин Светозарев, кој е и костимограф. Изборот на музиката е на Александар Морфов.

– Се работи за нова сценска адаптација. Ова е втора соработка на МНТ со Александар Морфов. Лани имавме премиера на „Животот е прекрасен“, која во моментов е хит претстава и број 1 во МН, која станува наш голем фаворит за гостувања во странство, рече Пројковски.

Според него, „Ничија земја“ е една од најважните работи кои ги создал МНТ во последните децении и која ќе ве насмее и растажи до солзи.

Актерите Сашко Коцев, Никола Ацески, Гораст Цветковски и Славиша Кајевски констатираа дека имаат одлична претстава и ги повикаа посетителите да ја погледнат.