Рекорден јуни за македонските аеродроми – 12% повеќе патници во еден месец

Во периодот од јануари до јуни 2025 година, скопскиот и охридскиот аеродром опслужиле вкупно 1.529.451 патници, што претставува пораст од 5% во однос на истиот период лани – соопштија од ТАВ Македонија, концесионерот на двата меѓународни аеродрома во земјава.

Паралелно со зголемувањето на бројот на патници, евидентиран е и пораст на авиосообраќајот од 3%, со вкупно 12.235 авиони кои слетале и полетале од Скопје и Охрид во текот на првата половина од годината.

Од компанијата велат дека овој раст се должи на воведувањето на осум нови редовни линии од двата аеродрома. Од скопскиот аеродром годинава започнаа летови кон Амстердам (Transavia), Париз – Орли (easyJet), Лион и Барселона (Wizz Air), Анкара, Чукурова и Дијарбакир (Ajet), додека од охридскиот – кон Истанбул (Turkish Airlines).

Дополнително, туристичкиот сообраќај го зголемија и чартер летовите на Freebird Airlines, кои во текот на летната сезона носат туристи од 13 европски градови.

„Целиме кон отворање нови рути и привлекување на авиокомпании кои ќе воспостават нови врски од македонско тло. Ги анализираме интересите на патниците и се насочуваме кон дестинации од шпанското и италијанското крајбрежје, како и кон главни европски градови кои се важни за економските, дипломатските и културните врски на Македонија“, изјави Неџат Курт, генерален директор на ТАВ Македонија.

Податоците покажуваат дека јуни бил особено успешен месец, со зголемување на патничкиот сообраќај од 12% во споредба со јуни 2024 година – што, според ТАВ, е позитивен индикатор за остатокот од годината.

Најчести дестинации од Скопскиот аеродром остануваат Истанбул (и IGA и Sabiha Gökçen) со пазарен удел од 17,1%, потоа Базел (6,6%), Франкфурт (5,7%), Цирих (5%), Минхен – Меминген (4,6%), Дортмунд (4,5%) и Виена (3,9%).

На ниво на држави, најголем број директни летови се реализирале кон Германија (26,5%), Турција (22,6%), Швајцарија (11,6%), Италија (5,4%) и Шведска (4,2%).

Посебно значајно е што аеродромот „Св. Апостол Павле“ во Охрид бележи двоцифрен раст од 10,9% со вкупно 103.792 патници, додека Меѓународниот аеродром Скопје регистрирал пораст од 4,47%, односно 1.423.039 патници во првите шест месеци од годинава.