Евровизиските скандали продолжуваат – Малта потрошила преку 650 илјади евра за евровизиската песна

Минатата недела се одржа 65-то издание на изборот на песна на Евровизија, но скандалите продолжуваат и една недела по финалната вечер.

По скандалот со Дамијано Давид и користењето на дрога во бекстејџот за финалната вечер, се појави нов скандал кој овојпат се однесува на Малта.

Овојпат, во центарот на скандалот е претставничката на Малта, која беше фаворит во обложувалниците неколку недели пред почетокот на изборот за песна на Евровизија, за на крајот да заврши на 7-то место. По финалето стана под знак прашалник како е можно таа да има добиено само 47 гласа од гледачите, а беше еден од главните фаворити.

Ова предизвика сомнежи и кај властите во Малта и било утврдено дека Малта потрошила повеќе од 650 илјади евра за промоција на евровизиската песна.

Според порталот „Times of Malta“, досега е познато дека туристичкиот одбор на Малта има инвестирано 350.000 евра за промоција на Дестини, додека околу 300.000 евра се инвестирани од јавниот сервис.

Наводно дел од парите им ги дале на странски инфлуенсери, кои потоа на своите социјални мрежи ја промовирале евровизиската претставничка и нејзината песна.

Ревизијата иницирана од Министерството за внатрешни работи започнува на 31 мај, а кога ќе бидат познати резултатите, ќе се одлучи кој и како ќе биде одговорен за оваа состојба.